早排警察拉錯一名智障人士，之後承諾檢討，民建聯博士級人馬葛珮帆就針對此事兼以前嘅庾文翰失蹤事件，去信勞福局局長同保安局局長建議，認為政府搞個「弱智人士自願登記名冊」，等弱智人士可以自願登記，「清楚註明其負責的社工及其家人的聯絡方法」，咁日後有人「自稱弱智，或懷疑是弱智」，警方、海關、入境事務處可查核有關人士，再通知家人或社工，仲話此舉「可以保護弱智人士的權益」，仲「避免有人詐稱弱智人士不與前線人員合作」。
建議喺網絡惹起熱烈討論，有網民問既然係弱智人士，點會明乜係「自願登記名冊」？邊個代佢做決定？而就算係自願，都有標籤同歧視之嫌，難怪有網民係佢fb留言話：「好提議，不如寫你自己落去先！」