預算案拉布戰發展到今日，差唔多見到盡頭，大吉利是講句，今次拉布戰打咗咁耐，好似一次流會都未試過，當中除咗因為建制派出動一定數量嘅議員之外，泛民主派亦都恪守早前向建制派嘅「照會」，派出一半議員出席會議。原來成班泛民背後，有一位議員不停喺度鞭策住，而呢位仁兄、或者應該叫仁姐先啱，就係民主黨主席劉慧卿嘞。
大家都有眼見㗎啦，雖然泛民話咗會出一半人留守會議廳，但係老實講，有幾多時係做得到㗎先？而響鐘點算法定人數又不斷發生，由進入全體委員會階段開始，即係拉布戰正式開始以來，計埋噚日，響鐘次數已經有成86次，等候議員歸位嘅時間亦都花咗超過14個鐘。
短訊向議員匯報
個鐘每次最耐只能響15分鐘，而今次拉布戰以來，不知幾多次響到14分鐘以上先夠腳呀。花生友聽聞，好多時卿姐會喺響鐘之後，即時發短訊畀泛民，提醒佢哋個鐘響咗幾耐、會議廳又得番幾多位泛民在席，即時向盟友匯報最新消息。
有泛民話，雖然卿姐冇叫過啲議員歸位、泛民亦對卿姐嘅訊息「只讀不回」，但相信卿姐呢啲「溫馨提示」都起到警惕作用，到時到候，泛民就知道係時候早點歸去。
花生友深信，卿姐之所以咁肉緊，都係因為紀律嚴明嘅佢，本住開會係議員嘅責任嚟提醒泛民，始終流會就係不在席議員嘅問題吖嘛。
花生友