前經濟發展及勞工局局長葉澍堃嘅退休生活確係好逍遙，佢主要做幾間上市公司嘅獨立非執董，定期開會，閒時佢經常同埋太太周遊列國或四出搵好嘢食，最近佢見新昌管理（2340）股價飆升，忍唔住沽咗些少套現約71萬元，簡單去個豪華遊都好喇。
葉澍堃係新昌管理獨董，呢隻股以往冇乜點郁，上月中開始乘住港股大時代個勢，忽然喺1.4元水平起步，好似火箭咁升到嘭嘭聲，噚日收報3.29元。葉澍堃本身有批購股權，行使價1元樓下。
根據聯交所資料，佢上星期二至四，分開3天，行使部份購股權然後沽貨30萬股，平均價2.3至2.42元，套現共約71萬元。佢仲有60萬股購股權可以行使，睇隻股嘅走勢，佢慢慢沽都得喇。