唔少建制派嘅「惹火尤物」，包括民建聯「粗口大狀」馬恩國同經民聯梁美芬等，噚日都盛裝出席周融嘅「HKG報」成立典禮，但最矚目卻係李偲嫣，事關佢脫下學生妹裝束，換上黑色套裝短裙露出玉腿撐場，旋即引來行家嘩嘩聲，話佢點解偲嫣BB睇落「比以前瘦咁多」？
不過偲嫣BB突然低調，到場先撥弄一輪秀髮，同周融握手影相後就聲都唔聲，未有回答傳媒提問。
為免俾偲嫣BB搶晒風頭，周融都以奇招突圍搶鏡，話要即場公佈「誰是真冇普選面孔」選舉結果，指網民選出李卓人、黎智英同梁家傑三位，並即場擺出三人打上巨型交叉嘅巨型頭像，好有文革色彩，亦成功抽晒水。
噚日雖然一位司局長都冇撐場，佢卻整咗個政改三人組紙板喺現場棟篤企「迎賓」；唔知三人組對於咁樣被「利用」，有乜感受？