六大商會噚日公佈聯合政改民調，個記招喺香港總商會舉行，順理成章由總商會職員負責接待傳媒，不過，總商會嘅安排卻令一眾記者好不滿。既然係民調，少不免又數字又圖表咁，唔少行家刻意提早少少去，諗住事先消化吓數據、以便準備問題，點知總商會職員派完新聞稿後隨即「回收」，話要等記招完咗先一次過派發。
如此奇特安排，搞到大家提問時好唔方便；有記者問有關職員，如果早走，可唔可以先攞新聞稿呢？點知得到嘅回覆係：「幫你唔到。」唔通呢份民調係機密文件，要指定嘅時間先可以「解封」﹖會後記者再向職員反映有關採訪安排嘅意見，對方解釋話呢個係一貫做法，仲話會後先派新聞稿，記者先可以「專心望住個mon（現場大螢幕）」，唔通佢唔信記者可以一心二用？