【C朗貪便宜鬼鼠逃稅網】
正所謂「衰有開條路」，皇家馬德里今季三大皆空，就連陣中班球星都頭頭碰着黑。當中，葡萄牙國腳基斯坦奴朗拿度（C朗）日前被葡國報章指佢涉嫌逃稅，而佢嘅法國射手隊友賓施馬就涉嫌無牌駕駛，二人極有可能分別俾葡萄牙同埋西班牙政府追究。
葡萄牙報章《晨郵報》日前爆料，俾女友艾琳娜飛兼捲入尼泊爾地震假捐款風波嘅C朗又有新麻煩。報道指，佢喺2012年同葡萄牙第一大銀行BES簽咗代言合約，喺之後兩年總共收咗130萬歐元嘅代言費，但就衰貪小便宜，冇將呢筆收入喺當地報稅，反而去咗愛爾蘭報稅。
C朗咁做，皆因愛爾蘭嘅稅率係12.5%，比稅率係25%嘅葡萄牙低一半，可以慳番約16萬歐元（約140萬港元）。查實佢唔係第一次捲入逃稅風波，幾年前就涉嫌同家陣喺車路士教波嘅前皇馬教練摩連奴一齊逃稅，但加埋嘅金額只係37,500歐元；咁少都要逃，可想而知C朗份人睇錢睇得幾重。據了解，葡國司法部門已經就C朗涉嫌逃稅一事展開調查，睇嚟佢應該有排煩。
【賓施馬斷正隨時要踎監】
除咗C朗之外，皇馬另一位球星賓施馬亦瀨咗嘢，但今次唔係衰十一，而係無牌駕駛。消息人士指出，佢日前喺馬德里嘅巴拉哈斯國際機場，俾交通警捉到佢無牌駕駛；事後佢堅稱自己係無辜，仲將張駕駛執照上載到社交網站。
不過問題係，賓施馬喺2013年三月因為超速而被停牌，喺11月停完牌之後，要先參加駕駛改進課程，之後至可以繼續揸車；家陣西班牙交通部門都未確定佢有冇去到上堂，若然佢冇去，即係未復牌，換言之係無牌駕駛。根據西班牙嘅法律，佢除咗要交720到約28萬歐元嘅罰款，同埋做社會服務之外，仲有可能入獄三至六個月！不過，相信佢入冊機會好低，多數罰咗錢就冇事。另外，賓施馬因為拉傷大腿肌肉，預計踢唔到周六西甲煞科戰。
皇馬教練安察洛堤亦唔好得C朗同賓施馬好多，今季佢贏唔到錦標，季尾離隊機會極大。消息指，球隊喺周六西甲煞科後就會炒佢，跟住會搵決定季尾離開拿玻里嘅賓尼迪斯頂佢個位。不過，肥安都唔愁冇着落，聽聞會返意甲，頂替篤定走人嘅恩沙基，重掌AC米蘭帥印。
識睇，一定係睇足英台【英波Live】：
http://soccer.appledaily.com
http://bit.ly/engballlive