專欄作家屈穎妍早前話被「黃色暴徒」恐嚇滅門，眼見同道中人受欺凌，周融又要出動，由佢任召集人嘅「幫港出聲」決定周日（24日）搞「千步默行」遊行聲援，話今日「黃色暴徒（實質懦夫）對屈穎妍的滅門恐嚇，實際是對香港人言論自由的死亡恐嚇」，所以「我哋都係屈穎妍」，個個都應該企出嚟說不，但比較諷刺嘅係，屈穎妍真身，據知唔會出席！
「為言論自由，本周日，企出來，撐屈穎妍！」幫港出聲噚日喺fb專頁發文，呼籲市民周日下午兩點半着白色衫喺中環遮打花園集合，三點出發默行至灣仔警察總部，「向扼殺言論自由的黃色暴力說不」，要求警方徹查事件；明言遊行風雨不改，同時話無論出席與否，希望大家喺fb畀個like。唔通like，都係交數一部份？
真身未必出席
之不過幫港出聲最初喺fb登呢個呼籲時，竟然將屈穎妍寫成「屈頴妍」，難怪有網民留言問到底當日出席嘅人，知唔知屈穎妍係乜水？但想藉住活動一睹屈穎妍風采嘅市民就要失望嘞，周融噚晚喺「HKG報」酒會透露，屈穎妍唔會出席，而當日參與者會舉住「我是屈穎妍」標語，仿效法國查理事件嘅做法喎。
嗱，去年反佔中簽名話有破紀錄151萬人參加、啱啱結束嘅撐政改簽名又話有121萬人嘞，周日嘅遊行，點都有近百萬啩？吓，暫預計只係1,000人？唔通簽名同現身，就係有呢個差別？八方噚日打去問屈穎妍，想問佢點睇大家對佢咁有心；屈穎妍有禮回應唔接受訪問。
李八方
mailto:[email protected]