戰友咖喱嘅今季英超最驚喜係「雙史」，小弟就認為係「雙特」，不過唔係謝拉特同林柏特兩位即將告別嘅老將，而係修咸頓左閘賴恩貝特蘭同李斯特城。
英格蘭以往左腳球員唔多，穩健左閘更加少，一個艾殊利高爾已經霸咗十幾年正選位，到佢老退後就輪到巴尼斯，不過巴尼斯本身速度唔高，年紀亦唔細，充其量打多一屆世盃；未來係年輕人嘅世界，英軍都有兩個左閘後起之秀勞基梳爾同賴恩貝特蘭。
從賣出梳爾，到買斷貝特蘭，充分顯示修咸頓獨到眼光，雖然貝特蘭老梳爾差唔多六年，不過一買一賣修頓執2,000幾萬鎊；而且睇到梳爾去到曼聯傷多過踢，反而貝特蘭喺修頓表現平穩，助攻威力亦唔差，更加係陣中今季唯一入選英超最佳陣容嘅球員。如果小弟係鶴臣，就寧願將未來正選左閘交畀貝特蘭都唔預梳爾喇。
𠵱家成日講《大時代》，其中最經典當然係大奇蹟日V形反彈，李斯特城今季都算幾V形，新升班開季幾對辦，反勝曼聯一仗更加係代表作，但隨住傷兵問題，加上踢法較柔，接連失分下，去到第29周都仲喺榜尾。不過去到生死邊緣，佢就發揮「小強」嘅生命力，近八場英超拎到六勝一和一負，唯一一場輸波對手係冠軍車路士。
李城球員中，小弟最鍾意占美華迪（圖），佢係少數腳下工夫唔錯嘅英格蘭前鋒，入到波又交到助攻，28歲仔大器晚成，英格蘭國家隊啱啱都召咗佢入伍。
文：牽牛
識睇，一定係睇足英台【英波Live】：
http://soccer.appledaily.com
http://bit.ly/engballlive