個別行業好容易被人定性為男人為主嘅行業，好似建築、物流、金屬買賣等，利記（637）太子女陳婉珊（Clara）都話，佢1995年畢業加入公司，𠵱家做到公司行政總裁，成日都被人問點解唔係佢細佬，而係由佢接手公司嘅管理。
利記主要銷售不銹鋼、鋁、金屬合金等金屬產品，剛陽味十足，Clara噚日出席一個午宴時指，自己係利記第4代，因為係長女，順理成章一大學畢業就開始返公司幫手。
佢話，入行之初，最大困難係要用表現，說服一班老臣子，證明自己真心想做呢行，佢亦由物流、送貨部門落手落腳做起。
佢平時接觸男性居多，合作伙伴或客戶多數係男人，就連玩都係跟男士做partner。佢最愛行山，曾與3位男隊友參加過毅行者，Clara笑言，男隊友可以幫佢拎埋物資！