收到兩封讀者電郵，問及前幾日談及新亞小師弟吳德灝在科學園創業，搞網上訂造西裝之事。為避免公開，已將兩封電郵轉送予吳德灝及佢嘅學長林曉鋒博士，由佢地處理。
林博士年紀輕輕，只有38歲，百分百本土產品，中學畢業後，入中大攻讀工學院，主修自動化與機械工程，一口氣拿得學士、碩士、博士學位，27歲畢業便創業，推出他讀書時研究出來的遊戲機遙控器，曾經成功過，也曾一敗塗地，重新再開始，今天已卓然有成，穩坐釣魚船。此日林博士約埋已有80歲而仍然活力充沛，到處遊埠嘅大師兄何萬森到中環與左丁山吃午飯，訂咗鏞記四樓，事先搵威哥留定一客清湯牛腩，果然精彩，遠勝燒鵝與古法炆斑腩。
原來林博士亦在科學園經營食肆，佢話科學園唔講唔知，有近一萬二千人返工，中午所有科學園食肆一位難求，但晚上放工後，各食肆就「靜英英」，到咗周末晚上，食肆又試人頭湧湧，故此生意起伏不定，幾難做。有一間意大利餐廳可能因為咁，覺得賺錢不易，索性轉讓股權，賣咗俾林博士。佢接手後，諗咗一輪，放棄中價模式，索性以游水活海鮮，上等靚牛肉靚羊肉一級食材為號召，轉走高價路線，一個set lunch要賣二百幾蚊，比蘇豪區史丹頓街嘅午餐（百幾蚊）還要貴。呢，科學園有的是老闆與高薪人士，間意大利餐廳（在湖畔）餐價貴咗，反為生意好咗，營業額上升，可見得做生意各有各做，只要走對市場定位，就可以賺錢。
創業呢回事，與讀書時叻唔叻無關，中大工學院收生成績，以中大嘅高標準，恒常排名在後，唔駛一定要有「火箭」，有鴨仔無妨。但工學院學生最識得研究開發新產品，將電子，機械，自動化與電腦程式相結合，係今日最新科研產品之模式。自己開廠發達嘅父母，理應鼓勵子女報讀呢類學科，不用讀甚麼商科、環球商業與法律。五月十八日有中信銀行之「大中華財富論壇」，左丁山碰到科大經濟及發展研究中心主任雷鼎鳴教授，同佢講起創業，佢話想起幾十年前同學分四班，成績最好嘅讀精英班（A班），同學後來多數成為律師醫生會計師工程師或教授，成績差的要讀D班，D班學生好多做咗廠家，幾十年後成為最發達一批校友。讀書叻仔一畢業就搵到好工，因機會成本高，唔敢冒險創業，咪平平穩穩過一生就算囉。