嚟到英超煞科，小弟同牽牛兄講起邊個球員或者球隊令人最驚喜，我當然第一時間諗起食咗天降異物嘅艾舒利楊格，之後就到「爆炸頭」費蘭尼，但小弟呢季都寫過佢哋幾次，費事再寫。醒起上輪對阿仙奴場波，有個畫面都幾令人意想不到，就係基斯史摩寧（右）戴起曼聯隊長臂章。
兩年前，如果有人同你講史摩寧做到曼聯隊長，你真係覺得佢黐黐哋；咁嘅質素，兩年後仲留得喺度都偷笑，仲話隊長喎！不過，佢𠵱家真係曼聯最可靠嘅中堅。一來，可能係球隊防線整體水平跌得太勁，所以「廖化作先鋒」，凸顯史摩寧已經算穩陣；二來，唔可以否認，佢真係越嚟越淡定。
喺上半季，史摩寧對曼城嗰陣愚蠢犯錯，搞到球隊上半場就踢少個，最後輸波，成為罪人。但講真，自從嗰次之後，印象中佢再冇大錯，反而成日幫拍檔補鑊，仲識助攻入波。史摩寧雖然高大，但速度幾快同靈活，希望下季可以繼續進步啦。
喺球隊方面，小弟覺得下半季嘅史雲斯調整得幾好。喺一月轉會窗，當韋菲特邦尼去咗曼城後，我都戥佢哋擔心，點知巴菲迪比高美斯又交到貨喎！呢一切都要歸功於領隊蒙克知人善任。蒙克上季季中接替勞特立，第一次擔正，係英超其中一名執教經驗最淺嘅教頭，但難得佢可以喺今季季中克服到主力射手離隊嘅危機！
文：咖喱
識睇，一定係睇足英台【英波Live】：
http://soccer.appledaily.com
http://bit.ly/engballlive