經民聯立法會議員石禮謙噚日正式用英基學校協會（ESF）主席身份，同CEO Belinda Margaret Greer見記者。佢話同英基結緣始於10年前去南島中學觀課，見到兩個老師陪住特殊學習需要學生上堂好感動，應邀加入校董會。
佢噚日講起2004年審計署查英基嘅舊事，話喺立法會俾King Arthur（李國章） 寸佢做英基校董有利益衝突、唔應該坐喺帳委會，佢話當時一早諗到，前一晚已經辭咗校董，令李國章好無癮。
政府按原定計劃，2016年9月起對英基陸續撤資，2016/17學年先減一年級資助，未來13年會完成撤資。現時每學年政府資助2億元，佔收入19%，撤資後會出現加學費壓力。石禮謙話明年3月會公佈首年撤資嘅學費，拉近旗下資助學校同私校嘅學費水平。