「忍一時得寸進尺，退一步變本加厲。」王宗堯和張建聲在新戲中，扮演高登網上世界裏面的監躉角色，首次孭飛擔正的王宗堯當街裸跑，跟谷肥50多磅扮大奸角的張建聲鬥搶鏡，兩人還要與廖啟智、黃光亮及已故的何家駒等老戲骨過招，面對眾前輩高手，身為男主角的王宗堯甘願認細，期待他日可以得寸進尺。
撰文：余燕儀
入行12年的王宗堯繼在電影《一路向西》崛起，再憑港視劇《選戰》、《導火新聞線》被封為男神後，終於在新戲《壹獄壹世界．高登闊少踎監日記》首次擔正，日前他跟增肥拍這部戲的張建聲在鰂魚涌接受本報專訪，王宗堯在戲中扮演典型二世祖，角色似乎不及要谷肥扮大奸角的張建聲搶鏡，王宗堯笑說：「唔覺蝕底，我覺得每個角色都有重要性，呢部戲有咁多人，個個咁好戲，唔係要去搶鏡。」
張建聲增肥食到嘔
為這部戲停工一年谷肥50多磅的張建聲說：「呢部電影對我意義好大，一日食五、六餐，有時食到想嘔，但諗到如果嘔咗出嚟又要再食過嘅苦況，一定要忍咗去。好想俾人嘅印象係張建聲有心做演員，唔係想做明星，我甚至驚做明星冇咗𠵱家嗰種踏實，因為冇可能再去街市，但我本人係屋邨仔，能夠行到今時今日已經係奇蹟，自己遲入行，用嘅力一定要比人多。」
《壹》改編自高登小說，除集齊監獄戲的兩大惡人何家駒（大咪）和黃光亮，還有老戲骨廖啟智坐鎮加強戲味，跟老戲骨合作是否壓力很大？男主角王宗堯在前輩面前認細：「我覺得無論做乜嘢，自己都係細，如果肯抱住呢個心態，就會好好玩同永遠都有嘢學，智叔氣場好勁，佢同我講一入化妝室就入戲。」
男神床戲自我挑戰
張建聲亦坦言：「第一日拍梗係驚，驚俾人鬧，但原來前輩咁玩得，肯同後輩交流jam嘢。光哥會教我哋做戲，話眼神應該咁樣，初時自己都驚大咪哥㗎，佢係惡人中嘅惡人，我哋拍一場動作戲，自己唔係動作演員，壓力非常大，但可以同經典人物合作好開心，感到非常光榮。」
男神王宗堯近年幾乎部部戲都要剝衫，又跟女星床戰拍情慾戲，在新戲中亦不例外，有裸跑戲及跟郭奕芯、Coffee（林芊妤）肉搏連場，問每部如是會否覺得悶？他笑說：「唔悶，因為除咗衫同着衫都係咁做，其實好玩㗎，自己又挑戰吓自己，加上高登始終有少少甜，呢個交畀我可以接受。」
化妝：Aster、YoYo Tang
髮型：Yman、Simm Lui of La mod salon
服裝：CLUB MONACO、CHOCOOLATE of I.T