財政司司長曾俊華噚日放低中產lifestyle，唔歎咖啡改去飲茶。佢噚日下晏出席中電社區項目「老友記嘆早茶」啟動禮，同中電總裁潘偉賢齊齊着住圍裙、推住點心車，大派點心畀長者慢慢歎，冧到長者不知幾開心！唔通佢有興趣轉行做「點心分發技術員」？
原來明年夠資格攞長者卡嘅財爺，閒時都去酒樓嘆番一盅兩件，佢話好多時周日都會同屋企人飲茶，大讚中電聯同四大飲食業商會同14區區議員舉辦呢個「老友記嘆早茶」活動，派12萬張早茶券畀約3萬名65歲或以上長者，請佢哋未來3個月於14區逾160間酒樓飲4次早茶，貼心又到位，事關朝早嘆一盅兩件係好多長者嘅指定動作，亦有助佢哋走動，擴闊社交圈子。有鋪selfie癮嘅財爺，仲喺巨型靚花牌前同潘玩自拍。