深圳創業板近期都稱得上係搶盡風頭，升完可以再升嘅戲碼又再上演一次，今年以來，滬綜指升37%，好多咩？深成指升近40%，唔算多吖，創業板足足升130%！
創業板約460家公司，市值高達5.75萬元（人民幣．下同），平均市盈率高達125倍。或者，閣下會認為，炒得創業板嘅，一早將個估值扔咗去堆填區，但創業板管理層似乎唔係咁諗。Wind統計，5月到而家，有125間創業板公司重要股東減持，金額133億元，今年以來減持嘅公司有229間，金額共459億元。
另一方面，內地又出現一啲公募基金經理揚言：「要死也死在創業板手裏」；「要死就死在一起」嘅綿綿情話，竟然由基金經理向創業板講，證明理智亦都被冷藏了。同一個時間，香港一隻投資內地創業板的ETF上個星期五唔覺唔覺咁上咗市，短短五日內，股價已升超過四成喇。
事實上，唔少人都知道創業板嘅風險，只係理智與貪念嘅鬥爭，無人會知幾時會有調整，亦都唔知阿爺會幾時出手調節一下，所以只可以奉勸一句：股票價格可升可跌，投資者需留意風險。
流氓