東岸決賽周三揭幕，作客嘅騎士靠「大帝」勒邦占士（LeBron James）上演個人騷，以97:89輕取鷹隊，為球隊先拔頭籌兼打破波神紀錄。周五進行第二戰，騎士就算要繼續作客都未驚過啦。（now635台明日8:30am直播）
史密夫28分做板凳王
決心帶領騎士再入總決賽爭冠軍嘅大帝，今場繼續一個人孭起成隊波，第三節仲搏到唔小心踩中攝影師而扭親，好彩冇咩大礙；佢全場交出31分、8個籃板同6次助攻，累積個人季後賽第52次單場至少攞到30分、5籃板同埋5助攻，超越曾經51次造出「30+5+5」紀錄嘅波神米高佐敦（Michael Jordan）。
而後備落場嘅後衞JR史密夫（J.R. Smith），今場12次起手射三分中八球，破埋隊史單場三分紀錄。佢個人貢獻球隊後備嘅全部28分，完勝五個球員夾埋交出19分嘅鷹隊板凳。賽後大帝憶起年頭球會仲考慮幫唔幫紐約人接收出名麻煩嘅JR過嚟：「我當時話，帶佢過嚟啦，我會搞掂佢。」所以話，大帝真係「唯獨你是不可取替」。
至於控衞K艾榮（Kyrie Irving），今場鏟籃時再整親本身已經發炎嘅左膝，但佢依然有信心喺Game 2落場。相反，落後一場嘅鷹隊就冇咁樂觀嘞。小前鋒D卡萊爾（DeMarre Carroll）喺第四節扭傷左膝，詳細情況要等掃瞄結果，但萬一呢位攻守兼備嘅硬漢唔出得，鷹隊真係大鑊嘞。
