現年52歲的荷李活動作影星湯告魯斯（Tom Cruise），近日於阿特蘭大拍攝新片《Mena》，他扮演走私槍械及毒品的毒販，還有搞笑的甩牙扮相，拍攝前後靚佬湯跟已婚的女拍檔Sarah Wright傾到手舞足蹈。
荷李活影星靚佬湯自於2012年跟姬蒂荷姆絲（Katie Holmes）離婚後，他的戀情一直為外間關注，之前靚佬湯拍攝《職業特工隊5：叛逆帝國》（Mission：Impossible─Rogue Nation）時，已曾傳出他跟女助手Emily搭上，靚佬湯所到之處均見到Emily身影，之後又傳過科學教會為靚佬湯安排一段新婚姻。
近日靚佬湯轉到阿特蘭大拍攝改編自真人真事的《Mena》，前日他扮演1980年代由飛機師變成走私軍火及毒品的商人Barry Seal時，於拍攝現場不停撩大前年已結婚的31歲女拍檔Sarah Wright，Sarah於戲中扮演靚佬湯太太，於鏡頭前後二人大為投契，靚佬湯更講到眉飛色舞，笑容滿面。
不停露齒笑
至昨日靚佬湯再跟Sarah演出，二人合演一場帶着子女離開屋企的戲份，與Sarah充滿默契一人手抱一件細路離開。靚佬湯更繼《雷霆喪星》（Tropic Thunder）扮禿頭肥佬後，再於新片扮醜，用特技化妝製造甩牙造型，面上又有扮被打傷的化妝痕迹，靚佬湯不停對偷拍的狗仔隊展露殘缺不齊的牙齒，看來他對新造型覺相當滿意。
撰文：盧葦
