曾叱咤Band壇嘅班霸Beyond，因黃家強同黃貫中（Paul）爆罵戰解體多年，近日葉世榮提出想重組Beyond開騷，紀念黃家駒今年逝世22周年，噚日家強喺新蒲崗接受本報訪問，曾經被阿Paul鬧到體無完膚嘅家強，被問到係咪願意同台？家強堅決拒絕：「唔願意，我覺得過咗底線，冇得返轉頭！」
「唔好做虧心事」
兩子決裂勢成水火，家強嘆喟：「如果當初唔係發生到咁冇面畀，咁冇保留地去攻擊我，我諗我可以一齊做嘅，但𠵱家冇得補救！」對於世榮想搞紀念騷，他坦言：「世榮話要認真搞一個，我尊重佢呢個行動，不過如果佢要搞騷，我唔會同台。」問想唔想同Paul見面？佢直言：「冇乜必要啩。」
Beyond前年30周年世榮拒絕搞騷，今年卻突然吹雞，難免被人覺得為錢復合？家強話：「我諗錢佢都唔憂，佢咁尊重朋友，有時利唔利用可圈可點，好難撩個心出嚟睇，無論邊個發起搞紀念活動，總之過得到自己良心去做就得，家駒係睇到你，所以千祈唔好做虧心事。」
撰文：馮仁昭