港交所（388）買起倫敦金屬交易所（LME）後，噚日第3年舉行LME亞洲年會，跟往年一樣，日頭研討會，晚上black tie dinner。今年以法國紅磨坊做主題，現場載歌載舞，港交所行政總裁李小加風騷咁話，今年搵到錢，可以請人表演，唔使佢粉墨登場。
筵開130席 1,600人參加
咁又抵李小加咁風騷嘅，佢舊年底促成滬港通，最初俾人話冇料到，點知過咗幾個月，上月開始推動港股進入大時代，連帶LME亞洲年會都越來越墟冚，噚晚晚宴筵開130席，比舊年多5席，共有1,600人參加；前年佢哋第一次搞只得800人咋。
晚宴先由幾位性感靚女跳舞掀序幕，李小加講開場白時，指越來越多人參加LME亞洲年會，佢真係好開心，佢希望滬港通開通，除帶旺股市，亦推動LME嘅生意。
李小加舊年喺晚宴着踢死兔跳舞兩分鐘，佢講笑話，舊年冇錢請人表演，所以要佢上台跳舞攝時間，𠵱家港交所賺大錢，佢終於唔使咁辛苦。
晚宴中段就有靚女跳肯肯舞，切合番紅磨坊呢個主題，令現場氣氛十分高漲。
李華華
mailto:[email protected]
