港鐵（066）主席錢果豐都想有人讓座畀佢？話說噚日港鐵舉行股東會，有3、4位年長嘅小股東不約而同投訴，話「𠵱家啲後生唔讓座」，63歲嘅錢果豐即刻回應話「感同身受」，指自己跟年長股東嘅年紀相若，「我搭MTR（港鐵）時，都好希望得到一定禮遇」。咁錢主席以後就要多搭港鐵，視察讓座情況之餘，順便睇實有冇班次延誤、壞車之類嘅情況嘞。
除咗冇位坐，小股東亦問到另一個貼身問題，咪就係不時被大媽戰車輾腳或撞到囉！有小股東建議港鐵仿效的士收取行李費，以紓緩內地客用行李箱霸佔車箱嘅情況。錢果豐讚呢個建議有創意，仲話「每個行李篋都要買八達通卡」，車務總監金澤培聽到即刻補飛，話已經有限制行李大小重量，如果收行李費反而怕乘客奉旨霸位，公司要再考慮咁話。