【本報訊】善玩財技的劉夢熊聲稱，在2009年獲邀幫東方明珠起死回生搞集資，當上掛名副主席，結果被指串謀詐騙，官司纏身。但劉說錯有錯着，「世態炎涼，CY啲面目，北京啲動作，就好清楚」。還說沒有包袱，可以講真話，「最憎CY同張震遠」。當年「豬、狼」特首選戰，劉坦言「撐錯老梁」，現在回想還是「豬好啲，佢（唐英年）唔會學CY咁，掩住良心，去到盡」。
沾上串謀詐騙之名，劉夢熊認為事件令他名譽受損，「困擾咗我兩年幾，日日串謀詐騙，啲人不知就裏，10個有3、5個信，信你兩年幾都瓜得啦，好彩我命硬」。不過，串謀詐騙官司亦令劉對身邊事看得更通透，「世態炎涼，邊啲真朋友，邊啲假朋友」。
2013年1月初，劉夢熊因本案被捕；至月中，劉向《陽光時務週刊》爆料，揭發梁的選舉黑幕，指梁在僭建事件上講大話，甚至涉賄選。約一星期後，劉被「搣柴」、落選新一屆全國政協委員。自此，劉稱發表意見時便可以較少掣肘，但這是否暗示過去一直掩住良心？「咁又唔係，做政協時候講真話，但堅決唔講假話，有時被迫唔講話囉」。
佢（唐英年）唔會學CY咁，掩住良心，去到盡。
劉夢熊不諱言「最憎CY同張震遠」，「唔係私仇，如果佢做得好，民望高嘅，我唔會咁憎佢呀，佢令到香港冇啖好食嘛……經濟轉型冇新方向，冇新增長點，搞埋啲死人雙辣招，既打擊有產階級，亦益唔到冇樓人士」。劉夢熊激動地說，還爆出十六字真言：「拍錯手掌，燒錯炮仗，投錯票箱，撐錯老梁。」
他批評梁振英沒有捍衞香港的利益，「有時北京過份的order（指令），令香港群情洶湧，你應該同阿爺講嘛，但佢唔係，阿爺叫佢向東就東，向西就西；阿爺叫你食屎就食屎，飲尿就飲尿，變咗你食你嘅屎，但香港人唔可以咁嘛，香港人有香港嘅核心價值」。有市民形容梁振英是賣港賊，劉夢熊也認同：「我覺得唔係冇道理，實際佢係損害香港利益，但我唔會用呢個名詞（賣港賊）。」
有一次一個的士司機告訴他，做了一個非正式的民調，訪問了20位本地乘客，問他們如果梁振英、吳克儉、鍾樹根、九龍皇帝曾灶財4人做特首候選人，他們會如何投票，結果曾灶財得16票。劉夢熊分析「選舉結果」：「即係死人都好過CY，證明啲人好嬲佢囉。」
（張震遠）過橋抽板，恩將仇報……（落得判監下場）我覺得佢咎由自取。
2012年2月中，傳媒揭發當時另一位特首參選人唐英年在九龍塘的大宅有僭建。為進一步打擊唐，當時一早表明撐梁振英的劉夢熊，親自去到九龍塘派《敦促唐英年退選書》。外界當時以豬形容唐英年，以狼形容梁振英，特首選舉就是「豬狼戰」。3年多過去，劉夢熊一臉感慨說：「豬好啲。」劉解釋：「如果涉及到香港核心價值，佢（唐）唔會學CY咁掩住良心，去到盡。」
除了梁振英，「頭號梁粉」張震遠也令劉夢熊討厭，「佢將最好智謀、最有資歷、最有經驗嘅拍檔（即劉夢熊）嚟到去排擠，過橋抽板，恩將仇報」。但他沒有交代二人結怨的細節。
張上月因為拖欠前商交所員工薪金，判囚6周，但准保釋等候上訴。宿敵落得如此下場，劉夢熊可覺得心涼？「我唔會嘅，我唔係咁（心胸）狹隘嘅人。但我覺得佢咎由自取」。
劉夢熊身形高大，但因被外界改了「Dream Bear」、「尖啤」這些別號，增添幾分可愛感覺。他說不介意別人這樣稱呼他，還覺得很親切，他很受落。
■記者黃幗慧