今季英超接近尾聲，曼聯由雲高爾領軍下，總算打番入前四名，下季歐聯捲土重來。周二曼聯年度頒獎禮晚會，最精采嘅係雲高爾上台做「咪霸」，講咗八分鐘球季回顧感受，全程霸氣盡露之餘，又不失風趣抵死，加佢之前喺席上「怒摑」副手兼紅魔名宿傑斯，惹嚟全場捧腹大笑，你話紅魔迷又點會唔愛死雲帥呢？
連迪加特老婆Deep V最搶
晚會最吸引觀眾眼球嘅，梗係唔少得一眾魔兵拖住另一半踩紅地毯到場。後備門將連迪加特冇乜機會出場，但佢帶埋女伴比姬莉就出晒位，後者着件Deep V，裏面真空示人，即刻K.O.晒其他WAGS。
雲高爾一向畀人感覺都幾嚴肅木訥，講嘢得勢不饒人；不過喺頒獎禮度就發揮佢嘅幽默感同激情。喺佢未上台之前，晚會進行慈善拍賣環節，坐喺雲高爾隔籬嘅傑斯大膽同佢爭，結果雲帥就兜嘢打去佢後腦度（圖）。唔使驚，雲高爾都係笑笑口作勢打落去，搞吓氣氛箒；不過咁多人望住，傑斯就算真係嬲都冇用，唔通發老闆脾氣咩，惟有一齊笑騎騎。之後到雲帥上台講嘢，佢回顧番今季喺曼聯嘅起起跌跌，七情上面咁去表達：「球季踢咗頭10場得嗰13分，仲要係喺曼聯呢間世界最出名嘅球會，咁嘅成績都知道班球迷應該嬲嬲哋，但估唔到球迷喺困難時期一路都支持我，同埋成個團隊。今季我哋一直受傷兵問題打擊，之不過球員士氣真係冇得頂，食住個勢由13位打到上第三。」
雲帥越講越興奮，好似邱吉爾喺二戰時期演講咁：「仲記得作客車路士場波，我哋之前連贏六場，場波亦佔上風，可惜都係輸咗，但真係好接近。」工作人員已經打晒圈，雲帥惟有講埋多謝球迷支持就準備落台，估唔到連演講都有encore，雲高爾喺掌聲中又返嚟話：「各位請注意，留意領隊仲有嘢講！傑斯同我講咗啲嘢，佢一向都好有道理，但今次就更加唔會錯，你哋係世界上最正嘅球迷；不過今晚仲爭少少，場上位女仕今晚吹色士風吹得咁好，畀熱烈掌聲佢啦。」
迪基亞雙料最佳
幾乎唔記得晚會嘅主菜，紅魔今季重返英超前四，門將迪基亞居功至偉，實至名歸蟬聯分別由球員同球迷選出嘅兩個年度最佳球員獎項。至於有關佢喺季後轉投皇家馬德里嘅傳聞，佢同女友艾杜妮當然都冇回應啦。
識睇，一定係睇足英台【英波Live】：
http://soccer.appledaily.com
http://bit.ly/engballlive