黑衣巨人「步步友」月初冠軍一哩賽行過對手，級際賽六連勝，繼續響世界馬匹排名榜排第一，本來篤定成為本季香港馬王，但「友瑩格」攻陷星洲KrisFlyer國際短途錦標，連同取得香港短途錦標、日本高松宮，成為首匹一季內於三地勝出三項國際一級賽的香港馬，有人話「友瑩格」亦有資格成為香港馬王。雖然「步步友」呼聲仍較高，但如果想毫無爭議之下封王，唯一途徑就係勝出6月16日英國皇家雅士谷賽期1600米一級賽女皇安妮錦標。
越嚟越接近女皇安妮錦標，「步步友」嘅主要對手亦浮現，英國練馬師向禮倫旗下「雷霆夜」日前喺1600米一級賽樂景傑錦標，頸位力壓廐侶「托摩亞」包Ｑ，兩駒都會挑戰女皇安妮錦標。其中「雷霆夜」乃去年英國二千堅尼冠軍，亦曾在聖詹姆士皇宮錦標、隆尚磨坊大賽、女皇伊利沙伯二世錦標上名，統統都是經典一哩大賽，老老實實計級遠高過「步步友」贏開嘅「美麗之星」、「駿馬名駒」之流。
「步步友」更厲害嘅對手，可能係赫德訓練的「經濟學家」，出道以來13戰8勝3位，勇奪應屆美丹馬場1800米一級賽杜拜草地大賽，該場彈甩四馬位，戲弄法國打吡及愛爾蘭冠軍錦標雙料盟主「幻想大亨」，加上之前勝出三級賽1600米昆西大賽及1600米二級賽韋士登錦標，顯示出本身在不斷進步中。
法國隊嘅「經濟學家」世界排名第三，亦係全球最高分灰馬，四出遠征經驗遠比「步步友」豐富，難怪目前英國外圍莊家將「經濟學家」定為女皇安妮錦標2.75倍大熱，「步步友」只是3倍次熱，「雷霆夜」7倍第三熱，「托摩亞」則13倍。