今晚快活谷馬場大雨下作戰，有位雨中殺手，佢就係澳洲騎師羅理雅。第二場贏完大熱門賀廐「歡悅星」，第三場四班一哩，隨即以蘇偉賢馬房之「創基寶」再下一城，羅理雅獨攬第二口孖寶，停賽復出後首次贏馬即起孖。
賢廐「創基寶」上仗同班同程畀雷神座騎「豁達瀟灑」劏咗，9.3倍半冷win爆唔成，今鋪5.1倍補中，「創基寶」首勝谷草兼打開季內勝利之門，成為馬主歐陽啟初本月初娶靚靚女友的新婚賀禮！
反觀方廐「騏名燈」相隔一周匆出雖提升名次，由上星期三晚第三，變今晚第二，但始終未能重開勝門，鞍上人柏寶賽後唔服輸，以途中受干擾為由，抗議「創基寶」頭馬資格，研訊時間都幾長，可惜最終被判無效，呢條Q有30倍派彩，中到好和味。
今場三、四名都係華將座騎，分別係楊明綸「匯聚力量」同何澤堯「感恩」，四重彩派二萬一千幾，反為大熱門「勝算高」於潘頓胯下跑落冇段好睇，所屬馬房容天鵬守齋超過兩個月，沉過沉底鱷！
歐陽啟初表示今晚極大雨，他的外父、外母冒雨入場打氣，研訊前已高高興興影了頭馬相，由於等候研訊時間頗長，令他很緊張，萬一真的被告甩，恐怕會令老人家失望，結果維持原判，令他感到很開心。