由前政務司司長唐英年牽頭兼任首屆常務理事會會長嘅香港江蘇社團總會，噚日喺君悅酒店舉行成立典禮，可謂冠蓋雲集，全國政協副主席董建華、中聯辦主任張曉明同署理特首林鄭月娥都係主禮嘉賓，副特派員胡建中、江蘇省政協副主席王雪非、中聯辦社團聯絡部部長李文都有撐場；理事會名單直情係當年唐營造勢大會翻版，任志剛、李國寶、吳光正同自由黨領導層都有份，就連梁振英當選後即刻轉軚嘅新世界發展主席鄭家純，亦係總會榮譽會長。
超人送花籃冇現身
至今都冇明撐CY嘅長和系主席李嘉誠同佢大仔李澤鉅，雖然冇現身，但人唔到都花籃到（圖）；而長和執董趙國雄原來係唐唐同鄉，即係江蘇常州人，所以做埋常務副會長。
搭咁大個台出來，唔少人揣測係上海幫圖為下屆特首選舉翻盤，唐唐卻強調「我唔係想做造王者」，但自言睇人眼光唔錯，相信可以喺會內發掘政治人才，仲話如果2017年有普選，佢都想投一票，但張票唔會投畀自己；問及田少話anyone but CY，唐唐笑稱「幼稚園讀abc後都冇讀過」。
唐唐為咗典禮花好多心機，仲向酒店提供江蘇食譜，等來賓一嘗19道家鄉美食，包括鹽水鴨、八寶飯等，仲有江蘇黃酒，佢仲試食過，包保正宗。
唐唐家鄉食譜
