啟德郵輪碼頭（圖）過去一年只得56架郵輪停泊，雖然比前年多咗一倍，但計埋仍然有近300日空檔，與其丟空，間唔時都會「踩過界」搞吓大型活動。政府計劃立法規管碼頭運作同管理，費清睇到其中一段，覺得頗為騎呢。
#立法規管 小題大做
事關擬定條文相當仔細，寫明禁止釣魚、行乞同亂拋垃圾。費清好質疑到底有冇人會走去咁隔涉嘅地方行乞？睇怕喺碼頭坐足幾日，都未必搵得到三餐；若然要釣魚，都寧願揀附近觀塘避風塘兩岸。
至於唔可以亂拋垃圾，基本上係常識嚟，全港都要罰錢。廣告都有播啦，冇人會幫你執手尾吖嘛！喺規管碼頭嘅法例都要再強調一次，未免小題大做。套句曾主席贈畀元秋姐嘅金句，「建議你考慮少啲講冇乜用嘅說話」。
不過，條例原意係想將啟德郵輪碼頭嘅管制同其他跨境渡輪碼頭看齊，其實合理嘅。旅遊事務署向立法會提交嘅文件，擬議條例草案包括劃定碼頭區域同限制區域。
登船輪候大堂保安檢查區、行李大堂等原本屬於限制區域，為咗配合搞活動，部份限制暫時放寬；條例亦會容許營運商同政府喺碼頭區域徵收費用。
當局暫定7月提交草案，目標喺今屆立法會任期內完成立法。
＃要生計，也要生活 ＃毋忘初衷
費清