樂壇教父顧嘉煇前晚在紅館完成12場的「顧嘉煇榮休盛典演唱會」，為54年的音樂生涯畫上完美句號。陳方安生、湯唯、胡楓、艾威及曾勵珍等人到場支持，眾多表演嘉賓中以張智霖最受歡迎，不單主動走到煇哥旁邊邀請影合照，又鬼馬攝位與歌迷自拍，𠱁到粉絲們暈晒浪。
騎劫煇哥作品展
與煇哥合作多年的汪明荃（阿姐），繼續以斑馬造型現身，不停風騷華麗轉圈。她表揚煇哥多年來對樂壇的貢獻：「煇哥嘅歌就係印證咗獅子山下嘅傳奇，見證咗香港最珍貴嘅年代。」講講下，阿姐突然轉話題叫大家撐香港，又勸勉年輕人要好好珍惜長輩為他們打下的江山。此時，有觀眾大叫「2017一定要得！」阿姐聞言即在台上附和說：「2017一定要得！呢個係大部份香港人嘅心聲，𠵱家香港咁太平、咁盛世嘅一個地方，點解要搞亂？」台下隨即傳來「噓」聲，更有人大叫：「我要真普選！」不過阿姐未有理會，獻唱《勇敢的中國人》。
張敬軒唔覺尷尬
阿姐在慶功宴上接受訪問時，表示因節目令她充滿回憶，有感而發講政改，但被噓會否尷尬？阿姐謂：「冇呀！我完全聽唔到，我只係聽到個個都拍晒手。」她又否認宣傳政改：「作為香港人，我做啲自己認為啱嘅嘢囉！」同場的軒仔被問到阿姐在台上講政改，他說：「係咩？我哋尊重各個意見嘅人士，唔會尷尬，因為呢個演唱會可能有啲政府官員在場，會有啲敏感！」而昨日有歌迷電郵本報，以「嚴重抗議汪明荃」為題，抗議阿姐在台上抽水宣傳新劇、講政治：「唔好借煇哥退休的最後最後一場搞cheap晒人哋個演唱會。」
採訪：盧妹
攝影：沈健程
