自從北水南下，本港股市妖股亂舞。繼恩達（1480）前周玩瘋狂過山車後，昨日到漢能（566）玩「笨豬跳」，急瀉近五成後停牌。妖股畀大家的教訓，除了風險高，最大鑊係逃生困難。唔想中伏，就要做功課，仲要留意莊家手影，尤其是北水莊家。《春嬌與志明》有句對白：「一世人流流長，總會遇上幾個人渣」，若果遇上人渣、妖股，記緊走為上着！
我揀股向來都睇基本因素，當然亦睇《人民日報》，近排在盈喜股中尋寶，發現鷹美（2368）幾合脾胃。鷹美以產銷運動服為主；又設立科研部門，與最大客戶Nike一齊研發新產品，定單穩定。
本來工業股唔多受市場重視，但《中國製造2025》規劃出爐，工業股忽然人氣急升。其實製衣業早已變革，增加機械使用不在話下；鷹美更與機械生產商共同研究自動化生產機器，以配合客戶需要，增強生產靈活性。
早年，鷹美決定在江西及印尼建廠，取代汕頭舊廠，過渡期資本開支大增，落成初期又唔夠熟手技工，影響接單，盈利大幅倒退。不過，隨着經營情況改善，2014年度中期業績省鏡，多賺五成兼恢復派息。早前更發盈喜，預計全年盈利大增，皆因：一）重組業務，主攻較高利潤的定單；二）改善生產流程；三）控制成本，包括精簡架構、停租汕頭一幢廠房，以及推行連串節流措施。
主席頻增持顯信心
鷹美大股東係台資鞋王裕元（551），持股38.42%；其次係身兼主席及行政總裁的鍾育升，持股15.32%；另有一家荷蘭基金持股8%。值得留意的是，鍾主席由2月23日至4月1日，28個交易日內合共增持17次，由1.425元買到1.8元。由於年結日為3月底的公司，兩個月後公佈全年業績，4月、5月進入敏感期，鍾主席不可再買才停手。
我相信鷹美低潮已過，正在復蘇。大客Nike近年雄霸運動品市場，又兼攻休閒服及禦寒衣物，鷹美唔憂冇新單；而且近年唔少開支屬新廠折舊，係賬面數字，實際已回復淨現金狀態，2月時更有閒錢認購理財產品。未來盈利和派息都有着落，加上鍾主席真金白銀以示睇好公司，我打算低位吸納。其實鍾主席增持期間，鷹美已升了一浸，鍾主席停手後才出現獲利回吐，4月中又發力飆上1.88元的52周高位，其後回調整固，本月則在1.75至1.85元上落。鷹美每股資產淨值達2.025元，現價1.78元，候1.75元買入，先睇2元。
割柑人
本欄逢周四刊登