中國前首富李河君旗下的漢能（566），昨日股價大插水，喺內地亦大把花生友熱議。漢能今年股價大升，原因與公司推出移動能源網概念有關。光伏產品可鋪喺汽車、屋頂，甚至背囊，解決未來能源問題。好多人對呢個夢想有質疑，但股價照升。
過往內地其實有唔少富豪，靠吹水上位，但最後被揭穿。例如八十年代首富，南德集團主席牟其中，豪言話要炸穿喜馬拉雅山，改造中國氣候，最後因金融詐騙被判無期徒刑。九十年代首富唐萬新，話要打造中國高盛，最後亦入獄。首富和首騙只是一線之差。
但亦有成功例子，例如阿里巴巴主席馬雲，不時放豪言壯語，但可以令投資者信服，最終亦成首富。漢能喺內地被稱為「光伏界阿里巴巴」，能否實現夢想，且拭目以待。
黃尹華