曼聯頒獎晚會歡天喜地，呢邊利物浦都係周二舉行年度頒獎晚會，但唔少紅軍球迷就睇得唔係幾開心，梗係啦，見到叛將史達寧攞年度最佳年青球員獎，仲唔全力噓爆佢。
少年得志嘅史達寧，據講已經同紅軍攤牌講明唔續約要走人，那邊廂已經傳出曼城準備好一份周薪20萬鎊嘅合約去簽佢。史達寧喺周二黃昏由紅軍總部出發嗰陣，已經有球迷噓佢，到晚會宣佈獲選最佳年青球員，柴台聲就更大。
至於喺晚會度接受到最多真心掌聲嘅，就係大贏家菲臘比古天奴，獲得由球迷同球員選出嘅年度最佳球員、最佳金球同埋最佳表現一共四個獎項；至於即將告別嘅隊長謝拉特，亦獲得卓越成就獎，表揚佢喺職業生涯一直為紅軍嘅付出。
另外，利物浦今季被踢出英超前四，加上一個盃都贏唔到，已經受到相當大壓力嘅領隊羅渣士，將會喺球季完結後去美國面聖，同班主亨利解釋失敗原因，不過據講佢帥位暫時都仲係幾穩。
識睇，一定係睇足英台【英波Live】：
http://soccer.appledaily.com
http://bit.ly/engballlive