阿里巴巴創辦人馬雲自言，冇女人，淘寶就冇用戶，為冧呢班米飯班主，佢專登揀咗同普通話「我愛你」發音相近嘅5月20日，即係噚日喺杭州舉辦首屆「全球女性創業者大會」，仲請來老友趙薇坐鎮。
話明女性大會，現場約500名參與者，9成係女性。做咗阿里影業（1060）第二大股東而身家水漲船高嘅趙薇成為焦點。趙薇雖然跟科網巨頭扯上關係，但原來佢用互聯網「主要就是看看一些資訊」，唔使再走去翻書或者去圖書館。
佢又自爆，舊年先至開始上淘寶網購物，主要係將食物直接運到老家送畀父母。佢老友馬雲聽到佢咁講，應該要快啲諗計，等佢用多啲淘寶，實行幫手做埋生招牌喇。需知道佢一入股阿里影業，隻股就升到嘭嘭聲，不過，早排趙薇沽咗少少套現10億元，噚日佢就冇解釋點解要沽貨嘞。