三歲新勝馬近排堅過石堅，贏完再出幾乎隻隻冇W有P。今晚谷草賽事雖然落住大雨跑馬，但完全影響唔到「有心人」呢匹蔡廐3歲新星之發揮，順利再下一城，捧走今屆法國五月盃。
「有心人」上次初出排11檔，克服難度贏四班谷草千二米響頭炮，呢鋪再用雷神，續戰同班同程第五場四班千二米，結果以2.4倍大熱門身份，輕輕鬆鬆後上再下一城，末段日本城老闆劉栢輝愛駒「家品大王」一度走甩咗，但「有心人」話過就過，表面只勝半身位，實際大把在手，表現充滿霸氣，超班本色表露無遺。
「有心人」與文廐谷草新貴「摯友無敵」同父，如今以三歲之齡兩出兩捷，保持不敗之身，前途一片光明。馬主麥鏡開廿年前有匹「開心人」於遮打盃與馬王「有性格」平頭雙冠軍；而最近麥氏家族的新聞，就是麥鏡開公子阿Ray麥偉汶，正與女藝人沈卓盈熱戀中，不過不知這對情侶是否有事在身抑或避傳媒要二人世界，這晚未見現身。
今場冷頭熱腳，「有心人」大熱，「家品大王」僅5.8倍，但跑第三之「紅褲精神」冷到89倍，第四名「大哥哥」亦23倍，四重彩派到五萬六千幾。