鄉議局6月1日下午改選領導層，通常改選前夕都會有好戲上演。鄉議局執委會噚日召開現屆最後一次大會，臨時加插特備環節，鄉紳送上「功高譽隆」嘅牌匾畀做足主席35年嘅劉皇發，藉此多謝發叔喺保障新界人權益嘅《基本法》第40條方面「勞苦功高」，令新界人有咗呢個「擋箭牌、金剛罩」。與此同時，又咁啱有7位離島鄉事會主席聯署撐發叔連任喎。
發叔謙稱不求居功，只望不負大家所託，繼而表明，雖則自己嘅健康有少少唔係好理想，但對大家叫佢連任嘅好意，會「加以慎重、積極考慮」，但都提示有意參選嘅人，要喺5月27日至6月1日2點前報名囉。