這天(19日)沙田晨課有位外籍老人家到場，與愛爾蘭籍騎師郭能結伴同行，郭能兒子阿Jack亦在旁。原來該長者是郭能太太的祖父，英國一位退休練馬師。今次來港探孫女一家，周三(20日)亦會到跑馬地馬場，為郭能打氣。
記得去年亦係五月，阿Jack的曾祖父來過香港，結果郭能當日勝出姚廐一對「百勝不厭」、「海洋活力」起孖，姚本輝有邀請呢位前輩拉頭馬。今次咁啱姚本輝又有一對馬「永神駒」、「小龍兒」交畀郭能操刀，莫非輝哥一早知道前輩又來港，特登有此安排，希望重溫一齊拉頭馬嘅好夢？
講番馬匹，郭能接受訪問，佢話第二場四班1200米嘅「永神駒」上仗輸得非常不值，轉彎時嚴重受阻勒避，最終只輸個零馬位，若非有意外，應係坐位望贏之馬。郭能話「永神駒」復課狀態保持大勇，今仗只要出閘順利，盡快切入克服外檔阻力，便有力收復失地贏馬。至於尾場「小龍兒」，郭能指此駒前仗同程谷草1650米入Ｑ輸鼻位純粹欠運，上仗梗頸四則因檔位欠佳，今次抽三檔理想，當然係爭勝份子。
郭能係多仔公，有三名兒子，太太祖父來港見到三位曾孫，肯定已樂不可支，如果仲有得拉頭馬，咁就真係不枉此行咯！