上周五九倉（004）股東會，前主席吳光正臨別秋波，由開會到見記者足足講咗3粒幾鐘先走人，可能吳光正都講到夠晒皮，噚日同系會德豐（020）股東會，佢冇現身，佢阿仔吳宗權第二年以會德豐主席身份主持股東會。
吳宗權噚日幾乎全程都係用英文照稿讀，表現算淡定，不過有小股東玩突襲，喺準備通過「增發新股一般授權議案」時，忽然舉手提問。
呢位小股東韓先生建議主席，如有需要增發新股時，可唔可以先用供股方式，唔係配股畀其他非現有股東，攤薄晒。
面對小股東挑機，吳宗權一時間都唔識點處理，即時望一望身旁嘅副主席吳天海，吳天海做口形提點，吳宗權先至行貨回應話，已經留意到小股東呢項建議咁話。