「保普選反暴力」大聯盟日前聲稱收到逾121萬個市民簽名撐政改，對於好多人質疑造數，甚至圖文並茂，發言人周融堅持係有人偽造相片。
其實大聯盟公佈過百萬簽名數字，點只用嚟撐袋住先咁簡單？中共喉舌《新華社》就識得執筍嘢嘞，前日喺大聯盟公佈數字後，即刻發表評論文章，以「順應香港主流民意 共圓政改美麗夢想」為題，話政改有成過百萬人簽名，等同有主流民意，「反對派」點可以唔跟？繼而點名《文匯報》、《大公報》、《香港商報》、《東方日報》、《星島日報》、《南華早報》、《信報》、《經濟日報》、《明報》等主要報章都用顯著版面報道、又呼籲通過政改，而呢批被點名有撐袋住先嘅「主要報章」中，《蘋果日報》榜上無名，係咪都係一種榮幸？