一聽啲乜乜物物同鄉會，唔少人可能同八方一樣，即時諗起兩個字：老套。牽頭成立香港江蘇社團總會嘅全國政協常委唐英年，似乎都想自己個新baby潮啲型啲，據聞佢一反同鄉會慣用紙媒發佈新聞嘅方式，特別搵人整咗個App，而且仲會推push，用更與時並進方法hard sell總會或者家鄉資訊。
總會今日下午喺灣仔君悅酒店舉行成立典禮，據知唐唐專登向酒店提供江蘇點心菜譜，等師傅照住做，以便來賓品嚐家鄉美點。據聞唐唐直情想喺江蘇請師傅返嚟幫拖，但因技術問題打消念頭。八方留意到特首梁振英咁啱放假，未能出席，乜CY𠵱家咁識趣？