「細佬，你幾時開始自閉的？」
倒帶回到九七，當年，記者不是黑影，差佬不是七俠五義，不會在認人手續中戴浴帽口罩。街口無暗角，龍和道是一片海。差館運作，從來沒有被法官評為「無法以常理解釋」。回歸18年，講過N年唔選特首的人，做了特首，經常忍唔住冷笑，感謝警棍和87枚催淚彈時，語氣抄襲習總。其餘時間，則不斷教訓年青人，月入得14K，無交過稅，要政府睬你？真是天真兼自閉！一定要睇醫生！（睇三輪投票都是支持831那批，包冇死！）
幾時開始自閉，別問細佬，問香港官場的大佬，尤其是兇完市民大喝一句「講完」才拂袖而去的局長大人。不是落街跟市民溝通嗎？既然鍾意閉門造車，在鐵欄圍攏起來的公民廣場中，招呼廣西社團一班大媽跳紅衫舞撐政府就夠。自閉、自慰，基本都是一套，都是阿爺的「參考材料」。任命特首與否，只供參考。寡佬還以為唔反對阿媽幫你揀老婆，就有錢塞入你袋！大佬，咁不如叫梁大伯放狗吧。2017，自閉都得，吳老闆唔願跳的火坑，由全身火屎的梁大伯機械式大喊：推（董）伯伯！佢死咗！我一定得！哈哈！