唔少人最近都問花生友，到底阿爺對特區普選係咪「打左燈、向右轉」？因為以中央企硬唔讓步嘅情況，就連建制派中人都私下「轉軚」，話北京似乎真係唔介意原地踏步咁款，因為唔變嘅風險低於變。有建制派中人就笑笑口話，當北京實際上都怕蝕底、寧願原地踏步之時，點解民主派睇唔出當中玄機，竟然同中央站在同一陣線？
呢位建制中人話呀，其實建制圈內嘅「有心人」，近來都成日以此「理由」勸說泛民三思，唔好口口聲聲堅決否定政改：「如果阿爺原來係唔想要，即係佢哋都諗到（通過政改方案）對北京不利啦，泛民點解唔諗吓呢點？點解唔諗吓同北京真正『對着幹』？唔好中咗佢圈套乜都反對？」
有建制中人話呀，當英、美都傾向支持袋住先，反映方案都未差至極，「如果真係過到，泛民可以有造王角色，試問英、美又點會唔高興？」
花生友曾經向泛民打探，建制派呢種「阿爺唔要、泛民更應該要」嘅理據係咪言之成理？有泛民中人劈頭一句就反駁：「梗係唔好信呢啲分析，都唔知係咪游說招數。」佢認為北京若然唔想政改方案過關，特區政府以致建制派未必要搞咁多大龍鳳，「仲要搞完啲落區騷，佢哋民望跌㗎喎」，認定北京始終想令政改方案通過，「過咗就習大大（習近平）好有face，試問點會唔想要？」
花生友