「龍華」系馬主、深圳龍華鎮首富百億富豪謝國輝，本月九日晚在沙田馬場設宴，慶祝「金珀龍華」本月6日在谷草取得季內第三捷外，也為孫仔（大仔謝劍鋒兒子）設生日宴，當晚「金珀龍華」的功臣，騎練賴維銘及吳定強，以及謝國輝細仔謝劍汶一家等亦有出席。
「龍華」系馬攻勢一浪接一浪，本周三(20日)晚谷草賽事更罕有出現夫婦對決情況。謝國輝名下的「金滙龍華」及太太金沛橋愛駒「國粹精華」同於第七場三班1650米列陣。
對謝國輝嚟講，最理想梗係一Ｑ返啦！咁買Win邊隻可以佔先？似乎老公可以食住老婆喎。「金滙龍華」近三戰非冠即亞，四歲馬潛力未見盡，其中上仗同程在楊明綸胯下，只以短頭位不敵「其樂無窮」，謝國輝喺晚宴上幽默地說，可能上場綸仔有點托大，以為勝券在握，結果輸少少。謝國輝笑言「金滙龍華」今仗無論邊個騎都會熱，因此請廐主沈集成一早卜定騎功最高嘅雷神操刀，希望收復前失。
「金滙龍華」的確有唔少有利數據，雷神、沈集成近五匹合作馬贏咗四隻，而最近三戰賽前一日沈集成獨操的戰馬「紅白」、「為食仔」及「阿甘」全勝，今次則獨操「金滙龍華」，擺明不容有失。相反謝太嘅「國粹精華」28戰仍未取勝，雖然上仗得亞軍表現唔錯，但買win就真係要諗清楚。