英超周一上演例行公事，由篤定封王嘅車路士，作客成功護級嘅西布朗，西布朗就由比拉希奴梅開二度，加上布拉特埋齋，大勝3:0，搞到車仔苦嘗今季最大敗仗；戰果爆一爆外，仲有車仔中場法比加斯29分鐘表演遠程射龜，省中西布朗中場布拉特，拎紅牌出場，煞科戰停賽外，隨時追加跨季波監。
直紅停三場 波監到下季
我求大俠思前想後，真係唔明法比仔喺呢場風流波點解咁躁底，表面最大原因都係季尾比賽踢到殘，不如提早申請休息，特別車仔下周日煞科戰主場對新特蘭開捧盃派對，法比仔停賽就一定唔使落場，可以一早換定西裝等捧盃，而且呢個係法比仔第一個英超冠軍，梗係重視啲啦。不過咁，法比仔今次直紅，睇嚟至少罰停賽三場，煞科戰停賽，仲要加監去下季，領隊摩連奴真係多得佢唔少。
另一個可能原因就係法比仔好想保護迪亞高哥斯達（DC）嘞，事關當期時DC同西布朗一大班球員爭執緊，法比仔可能擔心DC英文唔好，嗌交起上嚟好蝕，距離成20碼都射個波去解圍啦；嗱，法比仔射完龜，真係成班人圍佢，冇人理DC嘞，真係夠晒有情有義。
第三個原因都幾大機會，就係𠵱家累積18次助攻嘅法比仔，距離阿仙奴名宿亨利02/03球季嘅英超助攻紀錄爭兩次，為咗唔想再傷阿仙奴球迷嘅心，法比仔寧願出場兼停賽，都唔去破亨利紀錄。
第四個可能係想向碧咸致敬，2012年碧咸仲踢緊洛杉磯銀河，對聖荷西地震期間，就不滿對手詐傷，又整腳遠距離射龜，準繩度十足，咸爺好彩當年只係拎黃牌，唔似得法比仔直紅。
摩佬懶理輸波照寸
上述原因都只係我求大俠心諗，法比仔射龜真正原因，都真係只有佢先知；不過點都好，車仔以寡敵眾下大敗三球，原本應該死晒狗，但有霸氣領隊，自然有霸氣回應，摩連奴賽後就講：「你以為我輸0:3，就會喺隊巴喊咩？唔會囉，我哋已經拎冠軍。理想情況就係夠分攞冠軍就放假，唔使踢例行公事，怪就怪阿仙奴、曼聯、曼城同利物浦唔爭氣，搞到我哋提早拎冠軍。」而對於冇正選嘅門將施治，摩連奴就話本身好想留佢，但尊重佢意願，會放佢走喎。
識睇，一定係睇足英台【英波Live】：
http://soccer.appledaily.com
http://bit.ly/engballlive