學歷何價？物傷其類，喺網上睇到雜誌編輯招聘廣告，費清好感慨，學歷要求專上教育，又要兩文三語，但人工低過保安員。
有網友喺fb po咗呢兩張勞工處招聘廣告，一個婚禮雜誌請編輯，採訪寫稿編輯一腳踢，月薪7,300至9,000元；海怡半島請一般保安，小學程度，識廣東話，月薪就最少9,000元，每月勤工獎300至500元，仲會有OT錢（雜誌廣告冇寫，但呢行「肯肯定」冇OT錢）。兩份工都係6天，每日大約8小時。
「高學歷，低收入。這是甚麼市場文化？」、「要滿足編輯的入職要求的話，背後還需要背負高學歷帶來的一身學債」，網友留言話唔係眼紅保安員人工高，只係為高學歷、低人工感到不值。
不過，安俊人力資源顧問有限公司董事總經理周綺萍話，呢個只係較極端例子，專上教育程度月薪一般唔只7,000元咁少。但佢承認部份高學歷新人月薪，同保安員真係差唔多，只因有最低工資，但高學歷嘅長遠始終晉升機會多，加薪幅度較大，「如果表現唔太差，幾年後可以拉遠距離」。
佢仲話：「有個大學畢業生話自己人工低過做清潔嘅阿媽，但其實佢阿媽做咗20年，而佢啱啱畢業咋，其實工作經驗都值錢㗎。」打工仔何苦為難打工仔，其實唔應該比較高低學歷，矛頭應該齊齊指向老闆，爭取應得報酬。
費清
＃要生計，也要生活
＃毋忘初衷