到底年輕人唔肯入行喺街市劏豬，係咪純粹因為唔想俾人叫做「豬肉佬」咁簡單？工聯會立法會議員王國興前日同業界人士去見勞工及福利局局長張建宗，提到肉類刀手青黃不接時，建議將工種易名「肉類分割技術員」，覺得改名後專業啲，可以吸引更多新人入行，以免「豬肉佬」名稱令從業員形象被矮化，仲建議僱員再培訓局搞「肉類分割技術員」培訓課程，教參加者認識肉類部位同切割肉類方法㖭。
改名建議一出，網民熱論如果豬肉佬好似《國產凌凌漆》入面嘅星爺咁獨一無二、風度翩翩，係咪多啲人想入行？唔少網民就話，行業缺人離不開一個錢字，人工低，搵鬼做？與其改名，不如加人工好過。