特區政府為咗要立法會以三分二多數票通過政改方案，大打民意牌，大肆宣傳，利用政府優勢，不斷在電視電台播出廣告（免費的，政府有權以公共利益為理由，強令電子傳媒播出事關公眾利益嘅廣告，例如不要酒後駕駛、注意衛生等等，呢次就係赤裸裸政治宣傳），向市民疲勞轟炸，若講宣傳戰，政府佔盡優勢，反對831框架政改方案之人士，完全捱打。
但世事好奇，特區政府雖然出盡吃奶力，既賣廣告，又派高官企街派街招，支持831方案嘅民意，到目前為止，竟無壓倒性優勢，堅持反對嘅民意比率，企得好穩。諷刺嘅係，當兩者民意呈膠着狀態時，左報大罵特罵鍾庭耀之民意調查（其實係港大、中大、理大三間大學之民意調查單位合辦調查嘅，不是鍾庭耀一個人），指鍾庭耀故意誤導。點知罵街式謾罵出籠後，支持政改方案嘅民意竟然輕微上升，對政府有利。唔通又係鍾庭耀弄虛作假，怕咗俾左報鬧乎？
做乜要做民意調查？據講如果有六成以上民意支持831政改方案，可以逼使泛民議員轉軚，不敢在立法會投反對票云云。其實民意（市民大眾，包括非選民）與選民意見，有微妙分別。若果左丁山係立法會議員，只會最重視本人選區之選民（註冊選民）嘅意見，不會理會全港市民意見。功能組別議員更簡單，教協議員葉建源應重視教師意見，莫乃光應重視IT界選民意見，佢地唔會理醫學界、建造界選民點樣諗，或者全港建造界人士點樣贊同831方案嘅唧。
在直選議員方面，新界東立法會議員懶理灣仔居民意見，九龍東議員那管得薄扶林居民意見吖。咁講法，全港民意即使有六成支持831方案，對直選及功能組別議員應該不起作用，每個議員如果想在2016年不被選民唾棄，最好分別在自己組別／選區做選民意見調查，唔好亂咁聽全港民意調查結果。呢呢，英國五月大選前，全國民意調查話工黨與保守黨相持不下，人民支持度均等，點知在單議席分區選舉下，保守黨在不少選區都贏少少，咁就成為大多數黨，金馬倫得以連任，令全國性民意調查破產。泛民議員呢個時間應該默默做選區選民意見調查，才是道理。