著名投資者伊坎又講蘋果！今次佢話蘋果股價應該有240美元，即市值達1.4萬億美元，較現股價高85%。佢認為，普通人都未睇到蘋果嘅潛力，佢估計蘋果明年會推出電視，2020年推出汽車，兩個市場合共有2.2萬億美元呀！
伊坎星期一向蘋果行政總裁庫克發表公開信，話蘋果股價被低估，當然又再提增加股份回購啦。佢講完之後，蘋果周一收市升1.1%，即刻有反應。
前年伊坎喺Twitter透露自己大手掃入蘋果，指蘋果股價被低估，兩段文字令蘋果市值單日增120億美元（963億港元）；之後佢都成日喺Twitter發表偉論。不過《華爾街日報》引述消息指，其實蘋果做咗近10年研究，舊年已經決定擱置投入電視市場；另外亦有分析認為蘋果難以打入汽車市場。究竟蘋果可唔可以喺呢兩方面發圍，真係要拭目以待，可以肯定嘅係，伊坎星期一賬面賺咗。