新任警隊一哥盧偉聰今次訪京,可謂蝦碌頻頻、禍不單行。繼前日發生酒店房門電子鎖突然壞咗,一度不得其門而入,最終行程受阻,搞到去拜會公安部部長郭聲琨時差啲遲到後,噚日朝早盧Sir準備去拜會港澳辦主任王光亞時,竟然又有蝦碌嘢喎。
話說載住盧Sir架專車,喺就到港澳辦大樓之際,竟然駛錯咗去隔鄰嘅國家統計局大樓,相信係嗰位司機,一時無睇清楚門口就駛入去,結果架車要掉番轉頭,再駛入港澳辦,如果「入錯廟、拜錯神」就搞笑咯。八方覺得都好難怪嗰位司機,因為港澳辦大樓完全唔顯眼,門口又細,而且同國家統計局好似黐住同一幢樓,一唔留神都好容易走漏眼。