除咗會德豐（020）主席吳宗權，另一位富二代、華置（127）主席劉鳴煒噚日亦都被小股東嘅古怪問題殺個措手不及。話說劉鳴煒噚日主持華置股東會，佢一路有板有眼咁講解買地策略，主要話希望市場喺1至2年內調整，佢哋先至伺機出手云云。佢正經講完冇耐，有小股東忽然好認真咁問佢，點解華置只係向小股東派餅卡，而唔派餐飲集團優惠券，強調後者「flexibility（彈性）比較大吖嘛」。劉鳴煒未料到小股東有此一問，當場呆一呆，不過佢反應夠快，隨即以同樣認真嘅表情回應，「得，我叫同事研究吓」，小股東都暫時收貨。