佳士得搜羅唔少矜貴珠寶6月拍賣，好似38.51卡拉哥倫比亞天然祖母綠手鐲，由本地品牌Etcetera設計，估價1,800萬港元。專家話，綠寶石易有裂紋，未經處理而保持到高質素嘅大顆綠寶石特別珍貴；哥倫比亞綠寶石嘅色澤亦公認係最靚。
另外，孔子第75代孫孔祥熙同太太宋靄玲顯赫一時，收藏唔少珍品，佳士得6月將拍賣孔宋家族割愛嘅書畫同珠寶，包括張大千早期至中晚年作品，1946年畫作《觀音》筆觸細膩，張大千更以3年時間鑽研隋唐時代勾劃佛像方法同用色，估價600萬港元；中晚年作品則有水墨畫《幽荷清漪》，張當時眼疾嚴重，而且受西方風格影響，畫風抽象奔放、充滿層次感，估價250萬元。孔家亦割愛翡翠戒指、項鏈同手鐲拍賣，鑲工、設計充滿古舊韻味。除咗孔家珍藏，仲有奉文堂嘅齊白石作品，包括《大壽》同《宰相歸田》等。