上市公司管理層每次見人，公關通常諗定些少問題與答案，等管理層心裏面有個底，但有啲問題總係令人意想不到。
太古地產（1972）噚日舉行股東會，有位自稱係太古廣場一期寫字樓租戶嘅小股東李先生指，太古廣場原本有10隻已經絕育嘅流浪貓，𠵱家得番兩隻。
過去6、7年，李生每日留少少水與糧食畀貓仔，但佢不時被職員驅趕，清水糧食都被扔走，佢質問主席史樂山「咁大間公司，連兩隻貓都容忍唔到？」
史樂山即時問勻在場管理層，冇人知道流浪貓嘅事，佢惟有坦白咁話「你考起董事局啦」（I'm afraid you've stumped the Board）。會後行政總裁白德利留低向李生了解，應承會畀個交代。