英皇鐘錶珠寶（887）主席楊諾思（Cindy）每次出嚟見人都珠光寶氣，冇他嘅，佢做珠寶呢行，最方便就係自己做埋生招牌喇。
英皇珠寶噚日舉行股東周年大會，Cindy嘅飾物都算係簡單，只戴咗一對好搶眼嘅鑽石吊墜耳環，離遠都會見到閃吓閃吓。
Cindy話，自己淨係會戴自己公司嘅珠寶，就連公司投資者關係總監陸文靜都一樣，實行齊心幫公司賣廣告。不過，一講到鑽石幾多卡，呢對耳環幾多錢呢類咁敏感嘅問題，Cindy就話唔講呢啲喎。
唔講呢啲咪講公司生意囉，雖然呢排奢侈品市場唔太好景，Cindy都話，可能有1至3間舖唔會續約。不過佢對後市仍有信心。